老友記想每月收息 可考慮延期年金

上星期提到IT部門嘅Danny，因為爸爸有一筆儲蓄保險到期，所以想睇吓有咩投資選項。曉陽就建議可以考慮年期比較短嘅儲蓄保，或者選擇一年期嘅定存，令資金更有彈性。

但Danny就覺得，儲蓄或者定存唔係唔好，但始終都係要等一定時期先可以攞到錢，會唔會有一啲每月都有現金流提供嘅選擇？

市面上的確有類似每月派息嘅投資工具，但講到適合老友記，又要穩陣，其中一個選擇應該係年金。

年金一般分為兩種，包括「即期年金」同「延期年金」。

「即期年金」嘅保單持有人喺繳清保費後，就可以隨即開始收取定期年金入息。如果係準備退休，甚至好似Danny爸爸咁已經退休嘅朋友，又打算為自己自製「退休長糧」，其實都好適合考慮選擇「即期年金」。

Danny就有疑問，如果本金數目唔係好大，會唔會每月收益其實都好少？咁當然，視乎本金多少，能夠每月收到嘅定期年金收入，其實都可以相差好大。

不過，隨住年金開始普及，有唔少保險公司都推出優化版年金。例如有年金產品喺入息開始年度起嘅9個保單年度內，保證每月入息以相等於首期保證每月入息嘅3%按年遞增，幫老友記對抗通脹。

市場上嘅年金產品，一般收益率都可以有5厘或以上，對於老友記嚟講，如果本身都有一定儲蓄資金，再加上年金收益，足夠應付日常開支，又唔需要擔心風險好大。

但投資涉及風險，大家投資前記得做足功課！

（本欄逢周四刊登）